Мин дә үземнең шатлыгымны сезнең белән уртаклашырга уйладым, дуслар. Ә тарихы болайрак. Бу елның язында интернеттан үземә кирәкле ресурслар эзләп утырганда Саба районы Мишәбаш башлангыч мәктәбе укытучысы Шакиров Булатның шәхси сайтына килеп эләктем һәм бу сайтта теркәлдем. Шул көннән башлап сайт эшчәнлеге белән кызыксына башладым. Башта бер сорау туды: урта мәктәп сайтлары бар, башлангыч мәктәп сайтлары бар, ә нигә татар телендә эшләүче балалар бакчалары өчен сайтлар юк соң әле? Һәм мин үзем эшли торган балалар бакчасы эшчәнлеген яктырткан сайт ясап карарга булдым. Нидән тотынырга дип уйлап йөргәндә, сайт ясау эшендә тәҗрибәле кеше буларак, Булаттан ярдәм сорап, мөрәҗәгать иттем. Ул тыйнак кына ярдәм итәргә теләк белдерде. Булат ярдәмендә үземнең www.garaeva.ucoz.ru сайтымны эшләп чыктым. Булат исә миңа "Белем җәүһәрләре" интернет-проектлар бәйгесендә катнашып карарга тәкъдим итте. Гариза тутырып җибәрдем һәм түземсезлек белән бәйгенең нәтиҗәсен көтә башладым. Һәм менә ул нәтиҗә, дуслар: "Белем җәүһәрләре" II Бөтендөнья интернет-проектлар бәйгесендә икенче дәрәҗә Дипломга лаек булдым! Бу җиңүдә минем генә түгел, Булатның да өлеше бар. Шуңа күрә аңа бүген бик зур рәхмәт әйтәсем килә. Аңа тазалык-саулык, гаилә бәхете, эшендә иҗади уңышлар теләп калам. Безне, кулланучыларын, берсеннән-берсе кызыклы, файдалы материаллары белән куандырсын.
Дуслар, сезгә дә берничә сүзем бар. Сез дә татар интернетын үстерүгә үзегездән өлеш кертегез. Кемнең татар телендә интернет-ресурслар эзләп караганы бар, алар мине аңлар. Тематик сайтлар ясагыз, эзләнегез. Ярдәм итә алучылар барында куркып торасы юк. Уңышлар телим сезгә!